ພະແນກສຶກສາທິການ ແລະ ກິລາ ແຂວງໄຊສົມບູນ ໄດ້ຈັດພິທີ ແຂ່ງຂັນກິລາບານເຕະ ຊິງຂັນຫົວໜ້າພະແນກພະແນກສຶກສາທິການ ແລະ ກິລາ ແຂວງ ເພື່ອຂໍ່ານັບຮັບຕ້ອນວັນຄູແຫ່ງຊາດ ຄົບຮອບ 30 ປີ ( ວັນທີ 7 ຕຸ ລາ 1994-7ຕຸລາ 2024 ) ໄດ້ຈັດຂຶ້ນໃນວັນທີ 3 ກັນຍາ ນີ້ ທີ່ເດີ່ນກິລາແຂວງ ໂດຍການເຂົ້າຮ່ວມຂອງທ່ານ ພຸດລໍາໄພ ທຽມພະສອນ ຮອງຫົວໜ້າພະແນກພະແນກສຶກສາທິການ ແລະ ກິລາ ແຂວງໄຊສົມບູນ, ມີຄະນະພະແນກ, ບັນດາຜູ້ອຳນວຍການໂຮງຮຽນ ພ້ອມດ້ວຍ ທິມນັກກິລາຈາກບັນດາໂຮງຮຽນອ້ອມຂ້າງແຂວງ ຕະຫຼອດຮອດກອງເຊຍ ເຂົ້າຮ່ວມຢ່າງເປັນຂະບວນການຟົດຟື້ນ.
ການແຂ່ງຂັນການກິລາບານເຕະ ຄັ້ງນີ້ ແມ່ນເຕັມໄປດ້ວຍບັນຍາກາດຟົດຟື້ນມ່ວນຊື່ນ ໄມຕີຈິດ-ມິດຕະ ພາບ ທັງນີ້ ກໍເພື່ອເປັນການສ້າງຂະ ບວນການຂໍໍ່ານັບຮັບຕ້ອນວັນຄູແຫ່ງຊາດ ຄົບ ຮອບ 30 ປີ ທັງເປັນການຂໍ່ານັບຮັບຕ້ອນກອງປະຊຸມໃຫຍ່ 3 ຂັ້ນ ຂອງຄະນະພັກຮາກຖານພະແນກພະແນກສຶກສາທິການ ແລະ ກິລາ ແຂວງ ນອກຈາກນີ້ ກໍເພື່ອເປັນການສ້າງຂະບວນການຕ້ອນຮັບວັນສຳຄັນຕ່າງໆ ຂອງພັກ ຂອງຊາດ ທີ່ຈະມາເຖິງໃນຕໍ່ໜ້ານີ້ ເປັນຕົ້ນແມ່ນກອງປະຊຸມໃຫຍ່ 3 ຂັ້ນຂອງພັກ, ການກະກຽມເປີດປີທ່ອງທ່ຽວ ແຂວງໄຊສົມບູນ ແລະ ວັນສຳຄັນອື່ນໆ ໃຫ້ເປັນຂະບວນການຢ່າງຟົດຟື້ນມ່ວນຊື່ນ ທັງເປັນການຮັດແໜ້ນຄວາມສາມັກຄີ ລະຫວ່າງທິມນັກກິລາພະແນກສຶກສາທິການ ແລະ ກິລາ ແຂວງ ແລະ ບັນດາໂຮງຮຽນຕ່າງໆ ໃຫ້ມີຄວາມແໜ້ນແຟ້ນຍິ່ງໆຂຶ້ນ ນອກຈາກນີ້ແລ້ວ ຍັງເປັນການຫຼິ້ນກິລາອອກກຳລັງກ່າຍ ເພື່ອເສີມສ້າງສຸຂະພາບໃຫ້ມີຄວາມແຂງແຮງ ຕື່ມອີກ.
ການແຂ່ງຂັນການກິລາບານເຕະ ມີທິມນັກກິລາຈາກຂະແໜງການສຶກສາ ແລະ ກິລາ ອ້ອມຂ້າງແຂວງ ເຂົ້າຮ່ວມ ທັງໝົດ 7 ທິມ ຜົນຂອງການແຂ່ງຂັນ ລາງວັນຊະນະເລີດ ໄດ້ແກ່ທີມ ນັກກິລາ ພະແນກສຶກສາທິການ ແລະ ກິລາ ແຂວງໄຊສົມບູນ ໄດ້ຮັບລາງວັນ ຂັນ 1 ໜ່ວຍ ພ້ອມເງິນສົດ 2,000,000 ກີບ, ຮອງຊະນະເລີດໄດ້ແກ່ທິມກຸ່ມໂຮງຮຽນອ່າວໄຊ, ໄດ້ຮັບລາງວັນ ເງິນສົດ 1,500,000 ກີບ, ທີ 3 ໄດ້ແກ່ ທິມກຸ່ມໂຮງຮຽນ ມ.ສ ໄຊສົມບູນ, ໄດ້ຮັບລາງວັນເງິນສົດ 1,000,000 ກີບ ແລະ ລາງວັນຊົມເຊີຍ ໄດ້ແກ່ທິມ ກຸ່ມໂຮງຮຽນ ມ.ສ ນໍ້າໂມ້, ໄດ້ຮັບລາງວັນເງິນສົດ 500,000 ກີບ ຈາກນັ້ນ ກໍໄດ້ມີພິທີມອບລາງວັນຕ່າງໆ ໃຫ້ແກ່ທິມນັກກິລາ ຢ່າງເປັນທາງການ.
