ພະແນກສຶກສາທິການ ແລະ ກິລາ ແຂວງໄຊສົມບູນ ໄດ້ສຳເລັດກອງປະຊຸມ ຜູ້ບໍລິຫານການສຶກສາ ແລະ ກິລາ ທົ່ວແຂວງໄຊສົມບູນ ປະຈຳ ສົກຮຽນ 2023 - 2024 ໃນຕອນເຊົ້າຂອງວັນທີ 28 ສິງຫາ 2024 ນີ້ ຊຶ່ງພາຍຫຼັງດຳເນີນມາເປັນເວລາ 2 ວັນ ຢູ່ທີ່ຫ້ອງປະຊຸມພະແນກສຶກສາ ແລະ ກິລາແຂວງ ໂດຍການເປັນປະທານ ທ່ານ ຕົ່ງມົວ ຊົວໂກ້ ຮອງເຈົ້າແຂວງໄຊສົມບູນ ຜູ້ຊີ້ນຳວຽກງານ ຂົງເຂດວັດທະນະທຳ - ສັງຄົມ, ມີທ່ານ ຢົງຢີ ລີເຍ່ຍວື ຫົວໜ້າພະແນກສຶກສາ ແລະ ກິລາ ມີບັນດາທ່ານ ເຈົ້າເມືອງ, ຮອງເຈົ້າເມືອງ, ມີບັນດາຫົວໜ້າ ຫ້ອງການສຶກສາ ແລະ ກິລາເມືອງ, ມີທ່ານ ສົມດີ ຈັນທະວົງ ປະທານ ກຳມາທິການ ວັດທະນະທຳ-ສັງຄົມ ແລະ ບັນດາເຜົ່າສະພາປະຊາຊົນແຂວງ, ມີບັນດາຄະນະພັກ, ຄະນະພະແນກ ຕະຫຼອດຮອດພະນັກງານຄູອາຈານຢູ່ພາຍໃນພະແນກສຶກສາ ແລະ ກິລາເຂົ້າຮ່ວມ.
ຕະຫຼອດໄລຍະການດຳເນີນກອງປະຊຸມໃນ 2 ວັນ ທີ່ຜ່ານມາ ໄດ້ຮັບຟັງການລາຍງານຜົນສຳເລັດການຈັດຕັ້ງປະຕິບັດວຽກງານການສຶກສາ ແລະ ກິລາ, ທິດທາງແຜນການ ແລະ ຜົນສຳເລັດການຈັດຕັ້ງປະຕິບັດມະຕິກອງປະຊຸມ ຜູ້ບໍລິຫານການສຶກສາ ແລະ ກິລາ ທົ່ວແຂວງ ພ້ອມດ່ຽວກັນນີ້ຜູ້ແທນກອງປະຊຸມ ໄດ້ປະກອບຄໍາຄິດ-ຄຳເຫັນແລກປ່ຽນບົດຮຽນ ແລະ ໄດ້ຕົກລົງເຫັນດີຮັບຮອງເອົາມະຕິຂອງກອງປະຊຸມ ໃນຄັ້ງນີ້ ເພື່ອນຳໄປຈັດຕັ້ງປະຕິບັດ ສົກຮຽນ 2024 – 2025 ຊຶ່ງໄດ້ເຫັນດີ ແລະ ຮັບຮອງເອົາແຜນພັດທະນາການສຶກສາ ແລະ ກິລາ ປະຈຳສົກຮຽນ 2024 – 2025; ສືບຕໍ່ຈັດຕັ້ງປະຕິບັດ15 ຄາດໝາຍສູ້ຊົນ ສາມາດຈັດຕັ້ງປະຕິບັດບັນລຸ 9 ຄາດໝາຍ, ຍັງ 6 ຄາດໝາຍ; ເຫັນດີນຳເອົາ 4 ໜ້າວຽກ, 18 ມາດຕາການ ຕາມທິດຊີ້ນຳຂອງກອງປະຊຸມຄົບຄະນະບໍລິຫານງານ ສູນກາງພັກ ຄັ້ງທີ 8 ສະໄໝທີ 11 ໄປຈັດຕັ້ງປະຕິບັດໃນສົກຮຽນ 2024 – 2025 ໃຫ້ປະກົດຜົນເປັນຈິງ; ນຳເອົາຄຳແນະນຳຂອງຄະນະປະຈຳສະພາແຫງຊາດ ວ່າດ້ວຍການປຸກລະດົມໃຫ້ທົ່ວສັງຄົມເຫັນໄດ້ຄວາມສຳຄັນຂອງການສຶກສາ ແລະ ກິລາ ແລະ ນຳເອົາລູກຫຼານຂອງຕົນມາເຂົ້າຮຽນ ສົກຮຽນ 2024 – 2025 ໄປຈັດຕັ້ງປະຕິບັດ; ມອບໃຫ້ແຕ່ລະພາກສ່ວນທີ່ກ່ຽວຂ້ອງ ສຸມໃສ່ປະຕິບັດວຽກບຸລິມາສິດເພີ່ມເຕີມຄື: ວຽກງານກຳມາທິການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນແຂວງ, ວຽກງານຂະແໜງການສຶກສາກ່ອນໄວຮຽນ, ວຽກງານຂະແໜງສາມັນສຶກສາ, ວຽກງານການສຶກສານອກໂຮງຮຽນ-ອາຊີວະ ແລະ ການສຶກສາຊັ້ນສູງ, ວຽກງານພັດທະນາຄູ ແລະ ວິທະຍາສາດ, ວຽກງານຂະແໜງກິລາ- ກາຍະກຳ, ພາລະ ແລະ ສີລະປະສຶກສາ, ວຽກງານຂະແໜງສະຖິຕິ-ແຜນການ ແລະ ການພົວພັນຕ່າງປະເທດ, ວຽກງານຂະແໜງບໍລິຫານ, ຈັດຕັ້ງ, ກວດກາ, ປະເມີນຜົນ ແລະ ປະກັນຄຸນນະພາບ ແລະ ມີປະສິດຕິຜົນ.
ໃນຕອນທ້າຍກອງປະຊຸມ ປະທານໄດ້ມີຄຳເຫັນໂອ້ລົມ ຊຶ່ງທ່ານໄດ້ຍ້ອງຍໍຊົມເຊີຍຕໍ່ບັນດາທ່ານ ຜູ້ບໍລິຫານການສຶກສາ ແລະ ກິລາ ທຸກທ່ານທີ່ໄດ້ເອົາໃຈໃສ່ເຄື່ອນໄຫວປະຕິບັດໜ້າທີ່ວຽກງານເຮັດໃຫ້ມີຜົນສຳເລັດອັນພົ້ນເດັ່ນຫຼາຍໆດ້ານ ພ້ອມຍັງຮຽກຮ້ອງໃຫ້ເອົາໃຈໃສ່ສຶກສາອົບຮົມການເມືອງ-ແນວຄິດໃຫ້ໃຫ້ຄູອາຈານມີແນວຄິດອຸ່ນອ່ຽນທຸ່ນທ່ຽງ ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ເຊື່ອມຊຶມບັນດາມະຕິ, ຄໍາສັ່ງ ແລະ ປະຕິບັດຕາມລະບຽບຂອງລັດຖະກອນ, ສືບຕໍ່ເຄື່ອນໄຫວຈັດຕັ້ງປະຕິບັດແຜນຍຸດທະສາດ 5 ປີ ຂອງກະຊວງສຶກສາ ແລະ ກິລາ ແລະ ແຂວງວາງອອກແຕ່ ປີ 2021 – 2025 ໃຫ້ສຳເລັດ, ສືບຕໍ່ປະສານສົມທົບຢ່າງກົມກ່ຽວລະຫວາງສາຍຕັ້ງ ແລະ ສາຍຂວາງ ກັບທຸກພາກສ່ວນທີ່ກ່ຽວຂ້ອງໃນການປັບປຸງແກ້ໄຂ້ບັນຫາການສຶກສາ ໃນທົ່ວແຂວງໄຊສົມບູນໃຫ້ນັບມື້ນັບດີຂຶ້ນເປັນກ້າວ ພ້ອມໃຫ້ເອົາໃຈໃສ່ຕໍ່ການຂຽນກໍານົດຕໍາແໜງງານ ແລະ ການປັບປຸງການຈັດຕັ້ງໃຫ້ແທດເໝາະກັບພາລະບົດບາດ, ສິດ ແລະ ໜ້າທີ່ຂອງຕົນ.
